طال البعاد الجزء 2
طال البعاد الجزء 2
ملحقش يخلص كلامه غير ولقاها جريت من قدامه كالعادة فعمل زيها وقت ما قال:
= بتهربي ليه دلوقتي مش كان لسانك عشرة متر من دقيقة وعاملالي فيها سيادة الناظرة!
فضلت تجري منه في كل حتة وقالت:
ــ ناظرة إيه بس دا أنا محصلتش حارس البوابة!
فضل واقف متابعها وهي بتنهج وقال:
= ليه بقا ما تخليكي قد كلامك للآخر!
حاولت تتنفس ببطء وقالت:
ــ يا عم أنا عيلة وبرجع في كلامي، هو حد بياخد على كلام العيال!!
فاجئها وإتحرك تاني فجأة وبسرعة وهو بيقول:
= أنا باخد على كلامهم!
صرخت من الخضة وجريت من المكان اللي كانت واقفة فيه تاني وقالت:
ــ يا عم إقعد في جنب بقا نفسي إتقطع مش جيماوية زيك أنا وعندي عضلات مقوياني!، وبعدين مكانوش كلمتين يعني اللي قلتهم، ألاه!
سمعته بيقول:
= يجرالك حاجة إن لسانك مطولش!، ملحقتيش تكملي خمس دقايق على بعض هادية!، رغم إنك بتجري في الشقة زي الفار المبلول عشان متقعيش تحت إيدي!
وقفت مكانها بعناد على بُعد مسافة عنه وحطت إيديها على وسطها بإعتراض وقالت:
ــ حيلك حيلك!، إحنا مبنخافش من حد يا أفندي واللي عندك اعمله!
بصلها بغيظ وبدأ يقرب من مكانها ببطء شديد وقال:
= والله؟، بقا كدا!
فضلت زي ما هي على عنادها وقالت بنفس الغرور:
ــ كدا وأبو كدا وأم كدا كمان!
لقته بيقول:
= طيب وماله، إفتكري بس إن إنتي اللي طلبتي!
وفجأة لقت نفسها مرفوعة على كتفه بطريقة عكسية زي أي شوال حرفيًا فصوتت وقالت بخضة:
ــ سليم إنت إتجننت!، إنت بتعمل إيه، نزلني من هنا!
ضحك على كلامها وقال بسخرية:
= من هنا إيه بس، هو إنتي عشان أوزعة هتحسسيني إني طلعتك الدور العاشر!، وبعدين هكون بعمل إيه يعني، بوريكي عضلاتي اللي مقوياني عاملة إزاي!
خبطته في كتفه كتير عشان ينزلها وقالت:
ــ يعم وأنا ذنب أهلي إيه إنك طويل زيادة عن اللزوم!، وبعدين أديني شوفت خلاص نزلني بقا!
تجاهلها خالص فإتغاظت منه وفضلت تضربه في كتفه عشان يسيبها لحد ما وصل عند الكنبة اللي كانوا قاعدين عليها، ومرة واحدة راح منزلها عليها وبعدها مسك إيديها الإتنين ورجليها الإتنين ورفعها لحد ما قعد مكانه وسندها على رجله، وبعدها ساب رجليها وفضل ماسك إيديها الإتنين في إيده عشان تبطل ضرب فيه.
وبعد ما زهق من إنه يستناها تبطل مناحية قالها:
= هنهمد بقا ونبطل حركة وضرب ولا أكمل اللي كنت بعمله وأوريكي عضلاتي اللي مقوياني بجد!
كانت هترد عليه بعناد زي عادتها بس لحُسن حظها تليفونه رن في الوقت المُناسب وحتى بعد ما طلعه من جيبه بإيده الفاضية ورد على المُكالمة اللي كانت من أبوه مكانتش مبطلة حركة ولا مناحية وإستفزاز فيه بوشها لحد ما فتح الإسبيكر وساب الفون من إيده عشان يتحكم في حركتها فأبوه قال:
ـــ إيه يا إبني جهزت شُنطك ولا لسه؟
الرجاء تسجيل الدخول لتتمكن من التعليق