طال البعاد الجزء 3

طال البعاد الجزء 3

سليم إبتسم وقال:

= يعني تقدر تقول كدا لسه النُص يا حاج.

أبوه قال:

ـــ طب إنجزهم عشان إن كنت محتاج حاجة تانية نلحق نجيبها.

سليم قال بهدوء:

= حاضر يا حاج من عنيا.

أبوه قال بتذكر:

ـــ صحيح كنت هتنسيني أنا مكلمك ليه، قول لسجود حبيبة قلبي متعملش أكل بكرة عشان أمكوا عازماكوا إنتوا وإخواتك كلهم بعائلاتهم عندنا هنا على الغدا قبل معاد طيارتك بالليل بإذن الله، ومنبهة عليا مخليكوش تخلعوا المرة دي بالذات ولا إنك تتحجج بالطيارة والوقت.

مع كل جملة سجود كانت بتسمعها كانت حركتها بتقل لحد آخر حاجة قالها حماها، وقتها حركتها وقفت خالص ورجعت للشكل اللي سليم لقاها عليه لما رجع من برا، وسليم لما لاحظ قلة حركتها المتزايدة بص ناحيتها وفهم دلوقتي هي كانت بتفكر في إيه فرد على أبوه وقال:

= حاضر يا حاج من عينينا ليها، هو إحنا نقدر على زعلها برضو!

وبعدها أبوه قفل المُكالمة بعد ما إتطمن إنهم جايين، وفي نفس الوقت اللي سليم كان هيتكلم فيه لقى سجود سحبت إيديها من إيديه وحاولت تقوم تروح بعيد عنه، بس هو لما لقاها بتتحرك شدها تاني رجعها مكانها زي ما كانت من غير تفكير وقال بهدوء:

= فينا من الهروب من بعض ولا إيه؟

حاولت متبصلوش وتسيطر على إنفعالاتها اللي بقت على وشك إنها تغلبها في أي ثانية، بس أول ما رفع وشها ناحيته ولقته بيبصلها بكل المُحبة والحنية دي زي عادته مقدرتش تمسك نفسها أكتر من كدا وإنهارت من العياط.

وقت ما سليم لقاها بتعيط كدا شدها في حضنه وفضل يطبطب على ضهرها وراسها عشان تهدى وتطمن إنه لسه جنبها، وبرغم إن كان عندها كلام كتير تقوله إلا إنها سكتت وخرجت كل اللي هي حاسة بيه في العياط لحد ما سليم بدأ يحس إنها بدأت تهدى، شالها ودخلها تغسل وشها وبعد ما خلصت شالها تاني وراح على الأوضة عشان يخليها تنام في حضنه لآخر ليلة ليهم سوا في الإجازة دي.

تاني يوم الإتنين صحيوا، وطبعًا سجود حاولت تتعامل عادي وإن الدنيا زي الفل برغم إن وشها باهت ومصفر وشكلها وكأنها خست النص دا غير كمان إنها فضلت تتجنب تبصله أو تكلمه وقت طويل عشان ميحصلش منها حاجة زي اللي حصلت الليلة اللي قبلها.

لحد ما خلصوا تجهيز نفسهم عشان معاد العزومة اللي هيروحوها في بيت أهله، وبالفعل نزلوا سوا وسليم ساق بيها لحد هناك، وبعد ما راحوا لقوا بقية العيلة كلهم هناك وهما آخر الواصلين.

وبعدها مامته خدتها على المطبخ على طول مع بقية البنات وأول ما حضنتها راحت سجود معيطة تاني من غير تحكم عشان عارفة إن مامته فاهماها كويس، وعشان كل مرة بيسافر فيها من بعد ما كتبوا الكتاب بتبقى أصعب عليها من المرات اللي قبلها بكتير.

بعد ما البنات كلهم إدولها وقتها يا إما عيطوا معاها زي كل مرة بدأوا يجهزوا الأكل عشان يرصوه على السفرة برا عشان تأخيرهم دا ميلفتش حد أول حرف من إسمه سليم!