طال البعاد الجزء 5
طال البعاد الجزء 5
برغم إنها موقفتش عياط إلا إنه كان عارف إنها سامعاه فكمل وقال:
= عشان المرة دي بالذات مكنتش هتحمل أفضل بعيد عنك كل دا...
وبعدها إتنهد تاني وقال:
= وعشان كدا فضلت هناك على ما خلصت ورقك وجهزتلنا مكان عشان مبقاش لوحدي ولا أسيبك لوحدك.
سجود بعد ما سمعت كلامه فضلت ثواني مش مستوعباه لحد ما زقته وبعدت خطوة عشان تبصله وتفهم منه، وهو أول ما شاف عيونها اللي مليانين دموع دول رفع إيديه ومسحهم بيهم وحاوط وشها بيهم وقال بثقة وتأكيد وهو قاصد يوصلها كل حرف:
= إنتي جاية معايا يا سجود عشان للأسف لسه مش هنعرف نستقر هنا بالشكل اللي إحنا عايزينه لينا ولأولادنا في المُستقبل بإذن الله، وأنا مبقيتش قادر أفضل بعيد عنك كل دا أكتر من كدا، وعشان كدا جهزت كل حاجة لينا هناك وحجزت تذكرتك معايا وجهزت شنطك الصبح وظبطت كل حاجة في الشقة كمان وإنتي نايمة.
رجعت تعيط تاني وخبطته في كتفه وقالت:
ــ حرام عليك يا سليم!، إزاي هُنت عليك تسيبني في وجع القلب دا ومتقوليش طول الوقت دا كله!
شدها في حضنه تاني وطبطب على راسها وقال:
= حقك عليا والله يا قلب سليم بس مكنتش متأكد من أي حاجة لحد قبل ما رحت أحجز التذاكر إمبارح وكنت خايف طول الوقت دا أديكي أمل وأعشمك على الفاضي وأنا مش مالي إيدي، إنما إمبارح بصراحة إستحليت الأحضان اللي إنتي عمالة تحضنيهالي كل شوية وسوقت فيها.
نهى كلامه بضحكة هادية فخبطته في كتفه تاني وقالت بصوت مكتوم بسبب إنها في حضنه:
ــ مش مسامحاك على فكرة!
ضحك تاني وباس راسها وقال:
= حقك عليا والله، وقلبك أبيض بقا!
بس بجملة البياض يعني، حماكي والرجالة كلهم عارفين.
بعدت وبصتله بصدمة وبعدها رجعت تخبطه في كتفه تاني بغيظ وقالت:
ــ آه يا لئيم!، دا إنت طلعت مياه من تحت تبن زي ما بيقولوا ويتفات لك بلاد بصحيح!
ضحك على كلامها وقال بمرح:
= نفسي أعرف إنتي بتجيبي المُصطلحات دي منين!
بعدت عنه وبعدت إيده من حواليها وأما حاول يلمسها تاني ضربت إيده وقالت:
ــ إبعد إيدك دي عني وملكش دعوة بيا ولا بمصطلحاتي يا أفندي إنت!
ضحك وشدها في حضنه تاني عافية وقال:
= مقدرش والله دا أنا وقلبي نروح فيها!
بعدت تاني وقالت بدون تفكير:
ــ بعد الشر!
غمزلها وقال:
= عارف إننا منهونش عليك أبدًا يا جميل يا حلو إنت يا طِعِمْ!
بصتله بغيظ وقالت:
ــ لا وأنا اللي مُصطلحاتي غريبة ومش عاجباك!
ضحك بس قبل ما يرد عليها لقى أخوه بيرن عليه عشان معادهم خلاص جه، ولازم يمشوا حالاً.
وبالفعل خدوا حاجتهم ونزلوا سوا عشان يلحقوا يروحوا المطار قبل معاد الطيارة.
الدنيا صعبة علينا كلنا، وإن كان ربنا بالفعل خالقنا إحنا الإتنين سكن لبعض فطالما كدا كدا هنتعب فيها يبقى نتعب شوية كمان عشان نبقى سوا!
مش نفضل أنا وإنت كل واحد في مكان والفاصل بينّا مسافات وساعات وحدود ودنيا تانية لا إحنا ولا قلوبنا قدها!
وحجتنا إننا بنبني مُستقبلنا اللي المفروض بالفعل نعيشه من أول ما مضينا العقد بشهادة الشهود.
عيد التفكير يا حبيب القلب دا القلب مش متحمل والدنيا يا دوب ساعات تتعد
فـيا تفضل ويـايـا في أرضي...يا تاخدني وياك رحّـال!
الرجاء تسجيل الدخول لتتمكن من التعليق